शनिबार बिहान प्रधानमन्त्री केपी शर्मा ओली र सभामुख अग्निप्रसाद सापकोटाबीच प्रधानमन्त्री निवास बालुवाटारमा भेटवार्ता भएको बताइएको छ । 

शिष्टाचार भेट भनिएको उक्त भेटमा संघीय संसद्लाई प्रभावकारी बनाउने, समग्र संसदीय गतिविधि र संसद्‍मा विचाराधीन महत्त्वपूर्ण विधेयकहरूबारे छलफल भएको बताइएको छ । भेटघाट बिहान ११ बजेदेखि भएको थियो । 

लामो समयपछि भएको प्रधानमन्त्री ओली र सभामुख सापकोटाबीचको एक्लाएक्लै भेटका क्रममा सभामुखले वर्तमान राजनीतिक परिस्थितिबारे छलफल गर्न सर्वदलीय बैठक बोलाउनेबारे प्रधानमन्त्रीलाई जानकारी गराएको बताइएको छ । 

प्रधानमन्त्री ओलीले चालेको प्रतिनिधिसभा विघटन गर्ने कदम र संवैधानिक परिषद्‍सम्बन्धी विधेयकका विषयमा २ जनाबीचमा विवाद रहँदै आएको थियो । सभामुख सापकोटाले संवैधानिक परिषद्‍सम्बन्धी अध्यादेशविरुद्ध प्रधानमन्त्री ओलीसमेतलाई विपक्षी बनाएर सर्वोच्च अदालतमा रिटसमेत हालेका थिए । दुवैले एकअर्काप्रति शब्दबाण पनि प्रयोग गर्ने गरेका थिए । 

यस्तो पृष्ठभूमिमा प्रधानमन्त्री ओली र सभामुख सापकोटाका बीचको भेटघाट अर्थपूर्ण रहेको विश्लेषकहरूको राय छ ।