केही दिनमा समर्थन फिर्ता, महन्थजीहरू आउनुहोस् : प्रचण्ड
बृहत् नागरिक आन्दोलनले शनिबार गरेको अन्तर्क्रिया कार्यक्रममा बोल्दै नेकपा (माओवादी केन्द्र)का अध्यक्ष पुष्पकमल दाहाल प्रचण्डले प्रधानमन्त्री केेपी ओलीलाई 'दाह्रा किटेर' समर्थन कायम राखेको र केही दिनमै सरकारलाई दिएको समर्थन फिर्ता लिने बताएका छन् ।
उनका अनुसार संसद विघटनलाई असंवैधानिक कदम भनेर सडकमा गएका दलहरूबाटै हतारमा समर्थन फिर्ता नलिन उनीमाथि जबर्जस्त दबाब रहेको छ । दबाबै भए पनि आफूले थेग्न नसक्ने बताउँदै आगामी केही दिनमै ओलीविरुद्ध संसदमा अविश्वास प्रस्ताव ल्याएरै छाड्ने अध्यक्ष प्रचण्डको कथन छ ।
त्यस्तै, उनले जनता समाजवादी पार्टीलाई पनि ओलीलाई त्यागी आफूहरूसँग गठबन्धन गरेर सरकारमा जान आग्रह गरेका छन् । जसपालाई अस्ताउन लागेेेेका ओलीलाई छाडेर आउन भन्दै गठबन्धन सरकार बनाएर मधेसको मुद्दा सम्बोधन गर्ने प्रस्ताव पनि राखेका छन् ।
केपी ओली प्रवृत्ति मधेसको अधिकार र पहिचानविरोधी प्रवृत्तिका रूपमा स्थापित रहेको जिकिर गर्दै अध्यक्ष प्रचण्डले एक हप्ताभित्र मिलेर सरकार बनाउन सकिने अवस्थामा जसपा नेयाहरूलाई ओलीकहाँ किन धाउने ? भनेर प्रश्न गरे ।
ओलीलाई मधेसविरोधी भएको आरोप लगाएका प्रचण्डले मधेसका मुद्दा सम्बोधन गर्न आफूले २ पटक संशोधन प्रस्ताव लैजाँदा पास हुन नदिने केपी ओली नै भएको जानकारी गराए ।
उक्त कार्यक्रममा प्रचण्डले कांग्रेस, माओवादी केन्द्र र जसपा मिलेर सरकार बनाउने प्रस्ताव राखेका हुन् ।
