आज शुक्रबार अचानक काठमाडौँबासीका आँखा पोल्न थाले, श्वास फेर्नमा अवरोध महसुस भयो । धुम्म परेजस्तो, नखुलेको आकाश दिनभरजसो देखियो । 'के भइरहेको छ ? दिउँसै साँझ परेजस्तो भयो' भन्दै थिए मान्छेहरू ।

स्वास्थ्य मन्त्रालयले केहीबेर अगाडि विज्ञप्ति निकाल्‍दै घरबाहिर खुला स्थानमा नबस्न, नखेल्न, मर्निङ वाकमा नजान वा घर बाहिर गएर शारीरिक व्यायाम नगर्न अनुरोध गरेपछि प्रस्ट भयो- वास्तवमा काठमाडौँको आकाशमा आज निकै वायु प्रदूषण रहेछ ।

मन्त्रालयले बालबालिका, दीर्घ रोगी र ज्येष्ठ नागरिकको विशेष ख्याल गर्न पनि आग्रह गरेको छ। फोहोरमैलाको उचित व्यवस्थापन गर्न र जथाभावी नजलाउनसमेत म्न्त्रालयले सचेत गराएको छ ।

घरबाहिर निस्कनै परे अनिवार्य मास्क प्रयोग गर्न तथा कोरोनाबाट बच्नका लागि तोकिएका जनस्वास्थ्यका मापदण्डहरू पालन गर्न/गराउनसमेत मन्त्रालयले अनुरोध गरेको छ ।

धुवाँ, धुलो उड्ने ‍खालका पेसा, व्‍यवसाय र निर्माण कार्यहरू केही दिनलाई रोक्‍न र अत्यावश्‍यक नभई सवारी साधन नचलाउन पनि विज्ञप्तिमार्फत मन्त्रालयले आग्रह गरेको छ ।