आज शुक्रबार ज्योति लाइफ इन्स्योरेन्सले आईपीओ बाँडफाँट गरेको छ ।
बिक्री प्रबन्धक एनएमबी क्यापिटलले आज ज्योति लाइफ इन्स्योरेन्सको आईपीओ बाँडफाँट गरेको हो । गत २१ फागुनदेखि कम्पनीले सर्वसाधारणका लागि खुला गरेको आईपीओमा १८ लाख ४२ हजार ४८० आवेदकले आवेदन दिएका थिए । आवेदन दिएकामध्ये ४४ हजार ६४५ को आवेदन रद्द भएको बताइएको छ ।
कायम भएका १७ लाख ९७ हजार ८३५ आवेदकलाई गोलाप्रथाद्वारा शेयर बाँडफाँट भएको हो । योग्य आवेदकमध्ये गोलाप्रथाबाट ५ लाख ९४ हजार लगानीकर्ताले १० कित्ताका दरले मात्र शेयर पाएका छन् । यसरी आवेदन दिएकामध्ये १२ लाख ४८ हजार आवेदकले रित्तो हातमा चित्त बुझाउनुपरेको छ ।
उक्त कम्पनीले १०० अङ्कित दरका ६६ करोड बराबरको ६६ लाख कित्ता शेयर निश्कासन गरेको थियो, जसमध्ये ५ प्रतिशत अर्थात् ३ लाख ३३ हजार कित्ता सामूहिक लगानी कोषहरूका लागि छुट्याइएको थियो भने ३ लाख ३३ हजार कित्ता कर्मचारीहरूका लागि सुरक्षित गरिएको थियो ।
त्यसबाट बाँकी रहेको ५९ लाख ४० हजार कित्ताका लागि सर्वसाधारणले आवेदन दिएका थिए । लगानीकर्ताले न्यूनतम १० कित्ता र अधिकतम ६६ हजार कित्तासम्मका लागि आवेदन दिन सक्ने व्यवस्था गरिएको थियो । आईपीओ बिक्री तथा वितरणपश्चात् कम्पनीको चुक्ता पुुँजी २ अर्ब २० करोड रुपैयाँ पुग्नेछ । उक्त कम्पनीको आईपीओको बिदाबाहेक कुल ६ दिन बिक्री खुला रहेको थियो ।
यसको नतिजा थाहा पाउनका लागि मेरोशेयर, सीडीएससीले आईपीओ नतिजाका लागि तयार पारेको वेबसाइट र बिक्री प्रबन्धक एनएमबी क्यापिटलको वेबसाइटमा गएरसमेत हेर्न सकिनेछ ।