रावलले पनि नेपालले जसरी नै उल्टै स्पष्टीकरण सोधे ओलीसँग (पत्रसहित)
नेकपा एमालेका अध्यक्ष केपी शर्मा ओलीले असन्तुष्ट माधव नेपाल खेमाका ४ जना नेतालाई सोधेको स्पष्टीकरणको जबाफ माधव नेपाल र भीम रावलले बुझाएका छन् । नेपालले हिजो १२ चैतमा १३ बुँदे स्पष्टीकरण बुझाउँदै उल्टै अध्क्ष ओलीमाथि विधान मिचेको, पार्टी नीति र अनुशासनमा अध्यक्ष स्वयं नचलेको भन्दै अध्यक्ष ओलीलाई नै स्पष्टीकरण दिन भनेका थिए ।
पार्टी उपाध्यक्ष भीम रावलले पनि पार्टीलाई स्पष्टीकरण बुझाएका छन् । उनले बुझाएको स्पष्टीकरणपत्रमा पनि पार्टी अध्यक्ष केपी शर्मा ओलीप्रति नै प्रश्न उठाएका छन् ।
एमालेलाई एकतावद्ध बनाउन र मेलमिलाप कायम गर्न अध्यक्ष ओलीले नचाहेको रावलले अध्यक्ष ओलीमाथि आरोप लगाएका छन् ।
हिजो बुझाएको स्पष्टीकरणपत्रमा रावलले एमाले पुनःस्थापित भएपछि आफूसमेत एमाले र देश तथा जनताको उज्यालो भविष्य चाहने नेता र कार्यकर्ताहरूबाट ओलीसमेतका नेताहरूसँग विगतको तथ्यसंगत समीक्षा गर्दै कमी कमजोरी सच्याउँदै पार्टीलाई एकताबद्ध रूपमा अगाडि बढाउन गरिएको आग्रहलाई ओलीले अस्वीकार गरेको उल्लेख छ ।
१४ बुदाँमा ११ पेजमा प्रस्तुत गरिएको स्पष्टीकरणपत्रमा रावलले २ चैतमा धुम्बाराहीमा ओलीसमेत उपस्थित ओली निकटका नेताहरूसँग भएको र आफूसमेत सहभागी छलफलमा पार्टी एकता र मेलमिलाप कायम गर्दै विगतका कमी कमजोरी हटाएर सशक्त एमाले निर्माण गर्न सर्वोच्च अदालतको फैसलालाई स्वीकार गर्दै पार्टी तथा जनसंगठनहरूको संरचना पार्टी एकीकरणपूर्वको स्थितिमा रहेको स्वीकार गरौँ र ओलीबाट २८ फागुनमा अवैधानिक रूपमा गरिएको निर्णय बदर गरौँ भन्दा ओलीले नमानेको पनि उल्लेख छ । 'यसको तात्पर्य तपाईंमा पार्टी विभाजनको दुराशय रहेको देखियो किन नभन्ने ?' भनेर रावलले उल्टै अध्यक्ष ओलीसँग स्पष्टीकरण सोधेका छन् ।
पूर्ण पाठ हेर्नुहोस् :