आफ्नै देशमा कोरोना संक्रमित उच्च दरमा बढिरहेकाले कोरोनाविरुद्धको खोप भारतले अन्य देशमा निर्यात गर्न नसक्ने भनेर आएका समाचारको भारतले खण्डन गरेको छ । भारतले कोरोना खोप निर्यातमा कुनै पनि बन्देज नलगाएको बताएको छ ।

भारतीय अधिकारीहरूले कोरोनाविरुद्धको खोप निर्यात गरिरहेका मुलुकलाई चरणबद्ध रूपमा खोप उपलब्ध गराउने काम जारी रहने बताएका छन् ।

बरु खोपको निर्यात गर्ने समयमा केही तलमाथि हुन सक्ने उनीहरूको भनाइ छ । भारतले अहिलेसम्म ७५ वटा मुलुकलाई ६० मिलियन खोप उपलब्ध गराएको छ ।

प्रतिडोज चार डलरमा किनिएको उक्त खोपको २० लाख डोजमध्ये आधा पठाइसकेको कम्पनीले नेपाल सरकारलाई कोभिशील्ड खोपको बाँकी १० लाख डोज पठाउन  बाँकी छ ।

हालसम्म नेपालले भारत सरकारबाट अनुदानमा पाएको १० लाख डोज खोप, कोभ्याक्स सुविधाअन्तर्गत पाएको झन्डै साढे तीन लाख डोज र आफैँ खरिद गरेकोमध्ये प्राप्त १० लाख डोज मात्र पाएको छ ।