नक्कली नोट छाप्ने मेसिनसहित प्रहरीले २ जनालाई पक्राउ गरेको छ ।

नक्कली नोट र नोट छाप्ने प्रिन्टरसहित रौतहटका ३५ वर्षीय गनबहादुर लोप्चन र मकवानपुरकी ३९ वर्षीया माया तामाङलाई पक्राउ गरी महानगरीय प्रहरी वृत्त कालीमाटीबाट खटिएको प्रहरी टोलीले बिहीबार सार्वजनिक गरेको हो ।

प्रहरीले नक्कली नोट बोकेका व्यक्ति कलङ्की तरकारी बजारमा तरकारी किन्न आएको सुराकीका आधारमा बुधबार राती पक्राउ गरिएको जनाएको छ ।

पक्राउ परेकाहरूले कीर्तिपुरस्थित एक घरमा प्रिन्टर मेसिनसमेत राखेर नक्कली नोट छाप्ने गरेको अनुसन्धानबाट  खुलेको बताइएको छ । उनीहरूको साथबाट प्रहरीले एक हजार रुपैयाँ दरको ५१ थान, ५०० दरको ५७ थान, १०० दरको २ थान, प्रिन्टर १ थान, फोटोकपी पेपर, पेपर कटर १ थान, ल्यापटप १ थान र मोबाइल १ थानसमेत बरामद गरेको छ । 

पक्राउ परेका दुवै जनाका बारेमा आवश्यक अनुसन्धान भइरहेको प्रहरीले जनाएको छ ।