म्यान्मारमा प्रदर्शनकारीहरूले महिलाका कपडालाई सडकको वारपार डोरीमा टाँगेर प्रहरी र सेनालाई रोक्ने प्रयास गरेका छन् । परम्परागत रूपमा त्यहाँ महिलाका कपडामुनि हिँड्नु अपशकुन मानिन्छ ।
लोङ्गीलगायत महिलाका बाहिरी कपडाहरू र कहीँकहीँ भित्री वस्त्रहरू पनि त्यसरी झुन्ड्याइएको देखाइएको छ ।
बदला लिइन सक्ने आशंकाले आफ्नो नाम बताउन नचाहने २० वर्षीय एक युवालाई उदृत गर्दै रोयटर्सले बताएअनुसार लोङ्गीमुनिबाट हिँड्दा अलच्छिन लाग्छ भन्ने परम्परागत मान्यता रहेकोले सुरक्षाकर्मीलाई रोक्न त्यसरी महिलाका वस्त्र सुरक्षाकर्मी हिँड्ने बाटोको वारपार डोरीमा टाँगिएको हो ।
ती युवाले भने, 'आजको नयाँ पुस्ताले त्यस्तो कुरामा विश्वास नगर्ने भए पनि सुरक्षाकर्मीहरूले अझै विश्वास गर्छन् र उनीहरूको त्यही कमजोरीको फाइदा उठाउँदै संकटका घडीमा हामीलाई भाग्ने समय मिल्न सक्छ ।'
सामाजिक संजालमा छाएका भिडियोमा पनि अगाडि बढ्नुअघि सुरक्षाकर्मीहरूले त्यस्तो कपडाको डोरी हटाउँदै गरेको देखिएको छ ।
महिलाका कपडा झुन्ड्याउनाले प्रहरीलाई गतिरोध गरे तापनि अश्रुग्यास छोड्न र रबरका गोली चलाउनबाट भने रोक्न सक्दैन ।
१ फेब्रुअरीमा निर्वाचित सरकारलाई अपदस्त गरी सेनाले कू गरेपछि त्यसको विरोधमा लगातार भइरहेको प्रदर्शनमा सुरक्षाकर्मीको ज्यादतीपूर्ण दमनबाट ५० जनाभन्दा बढीको ज्यान गइसकेको छ ।
