अन्य ग्रह, उपग्रहमा मानिस तथा वस्तुको ढुवानी गर्ने उद्देश्यले दक्षिण अफ्रिकी धनाढ्य  एलोन मस्कद्वारा निर्माण गराइएको स्पेसएक्स रकेट (स्टारसिप)को तेस्रो परीक्षण उडान पनि असफल भएको छ ।

टेक्सासको बोका चिकाबाट बुधबार उडाइएको उक्त एसएन१० स्पेसएक्स रकेट अपेक्षित ढंगले पृथ्वीतिर फर्किएर पहिलो पटक ठाडो (भर्टिकल) अवस्थामा ल्यान्ड गर्न सफल भएको थियो ।

तर, त्यो खुसी धेरै समय टिकेन । ल्यान्ड भएको अन्दाजी ८ मिनेटपछि त्यो रकेट विस्फोट भएर आकाशमा उछिट्टियो र टुक्राटुक्रा भएर धर्तीमा खस्यो ।

के कारणले ल्यान्ड भइसकेको रकेट बिस्फोट भयो भन्नेबारे तत्काल केही बताइएको थिएन ।

गत डिसेम्बरमा एसएन८ र फेब्रुअरीमा एसएन९ पछि परीक्षणकै क्रममा बिस्फोट भएको यो तेस्रो रकेट थियो । तर, अघिल्ला २ रकेटको तुलनामा एसएन१० भने सुरक्षित ठाडो ल्यान्डिङको सफलता नजिक पुगेको थियो ।

उक्त स्टारसिपको परीक्षण दक्षिणी टेक्सासस्थित स्पेसएक्स परियोजनाले भाडामा लिएको मेक्सिको र मेक्सिकोको खाडीको सिमाना नजिकैको निर्जन क्षेत्रमा गरिएको थियो ।

पृथ्वीको परिक्रमा गर्ने स्टारसिपको पहिलो उडान यस वर्षको अन्त्यमा गर्ने योजना रहेको बताइएको छ ।