एपीएफ फुटबल क्लबले शहीद स्मारक ए डिभिजन लिगमा हिमालयन शेर्पालाई १-० गाेल अन्तरले पराजित गर्दै रेलिगेसन संकटबाट माथि उठ्ने संभावना जीवितै राखेको छ ।
आभाष लामिछानेको निर्णायक गोलमा एपीएफले दोस्रो जीत निकाल्यो । पहिलो हाफको इन्जुरी समयमा नवीन लामाको कर्नरमा आभाषले उत्कृष्ट हेड गोल गरे ।
बाँकी समय दुवै टोलीले गोलका केही अवसर बनाए पिन सदुपयोग गर्न सकेनन् । शेर्पाविरुद्ध एपीएफले ३ जना विदेशी खेलाडी उतारेको थियो । पहिलो हाफको इन्जुरी समयमा हिमालयन शेर्पाले खेलमा फर्कने अवसर पाए पनि त्यसको सदुपयोग गर्न सकेन ।
एपीएफका गोलकिपर युया कुरियामाले मिलन राईको प्रहार रोक्दा रिबाउन्डमा प्राप्त बलमा मुताम्बा पिस्टोनले गरेको प्रहार अकासिएको थियो ।
६३औँ मिनेटमा मिलनको कर्नरमा उलरिच सिइबीले गरेको हेड बाहिरिँदा हिमालयनले खेलमा फर्कने अवसर गुमायो ।
७०औँ मिनेटमा अर्मान्डले गरेको प्रहार हिमालयन शेर्पाका गोलकिपर दीप कार्कीले रोक्दा एपीएफले अग्रता दोब्बर पार्ने अवसर गुमाएको थियो ।
जारी लिगमा एपीएफको यो दोस्रो जीत हो । यसअघि एपीएफले फ्रेन्डस क्लबमाथि जीत हात पारेको थियो ।
हिमालयनको भने यो लगातार दोस्रो हार हो । हिमालयन पछिल्लो खेलमा थ्री स्टार क्लबसँग पराजित भएको थियो ।
जीतपछि एपीएफले ९ खेलमा १० अंकसहित आठौँ स्थानमा उक्लिएको छ । समान खेलमा ११ अंकसहित हिमालयन शेर्पा छैटौँ स्थानमा छ ।
