पूर्व अमेरिकी राष्ट्रपति जर्ज डब्ल्यू बुसले अफगानिस्तानबाट नेटो सैनिक फिर्ता गर्ने निर्णय गलत भएको बताएका छन् । उनले वर्तमान राष्ट्रपति जो बाइडेनले लिएको अफगान नीतिको पनि आलोचना गरेका छन् ।
कट्टरपन्थी तालिबान अफगानिस्तानको राजधानी काबुलतर्फ अघि बढ्दै गरेका बेला बुसको यस्तो टिप्पणी आएको हो । स्थिति यस्तै रहे तालिबानले चाँडै अमेरिका समर्थित अफगानिस्तान सरकार बिस्थापन गरिदिने उनको चिन्ता छ ।
देशका कयौँ जिल्ला तालिबानले कब्जामा लिइसकेको छ भने छिमेकी देशको सीमामा रहेका चौकीहरू पनि तालिबानको कब्जामा छन् । यसबाट अफगान सरकार निरन्तर कमजोर हुँदै गएको बीबीसीले उल्लेख गरेको छ ।
बुस प्रशासनले सन् २००१ मा अफगानिस्तानविरुद्ध सैन्य अभियान सुरु गरेको थियो । सो अभियान मुख्यतः तालिबानको तानाशाहीविरुद्ध केन्द्रित थियो । अहिले अमेरिकी सैनिक अफगानिस्तानबाट फर्कन थालेको छ र त्यहाँ पुनः तालिबान जुर्मुराएको बताइएको छ ।
बाइडेन प्रशासनका एक वरिष्ठ अधिकारीले पनि तालिबानमा लगातार बिग्रिँदै गरेको सुरक्षास्थितिप्रति चिन्ता व्यक्त गरेका छन् । तालिबानले ८५ प्रतिशत भूभाग कब्जामा लिएको दाबी गरेको छ । त्यहाँका ४०७ जिल्लामध्ये १९५ जिल्ला अहिले पूर्णतः तालिबानको कब्जामा छन् । थप १२९ जिल्ला कब्जा गर्नेतर्फ तालिबान बढिरहेको छ ।
यस्तो स्थिति निम्तिँदा पनि अफगानिस्तानबाट अमेरिकी सैनिक फिर्ता हुने गतिमा कुनै परिवर्तन देखिएको छैन । अमेरिकी प्रशासनका अनुसार सोमबार पनि अमेरिकी सैनिकको एउटा ठूलो जत्था अफगानिस्तानबाट फर्किएको छ ।
अमेरिकाले यसअघि नै ३१ अगस्टसम्ममा अफगानिस्तानबाट आफ्ना सबै सैनिक फिर्ता लैजाने जनाएको थियो । अघिल्लो बिहीबार ११ सेप्टेम्बरको हमलाको स्मरण दिवसका दिन पनि अमेरिकी राष्ट्रपति बाइडेनले अफगान सैन्य अभियान पूर्णतः समाप्त गर्ने बताएका थिए ।
यसअघि एक भाषणमा बाइडेनले तालिबानले पूरै अफगानिस्तान कब्जा गर्ने र सरकार चलाउने संभावना निकै कम भएको दाबी गरेका थिए । ७५ हजार तालिबान लडाकुले ३ लाख अफगान सेनालाई हराउन नसक्ने उनले तर्क गरेका थिए ।
पूर्व राष्ट्रपति बुसले अफगानिस्तान अभियान क्रममा अमेरिकालाई सहयोग गरेका दोभाषेलाई सुरक्षा प्रदान गर्न बाइडेन प्रशासन चुकेको र अब उनीहरूलाई विशेष प्रवेशाज्ञा कार्यक्रम ल्याउनुपर्ने बताएका छन् ।
