नेपाली जुडो खेलाडी सोनिया भट्टले टोकियो ओलम्पिक- २०२० का लागि वाइल्ड कार्ड प्राप्त गरेकी छन् ।
यसका साथै अहिलेसम्म टोकियो ओलम्पिकमा सहभागी हुने खेल ५ पुगेको छ । पौडी, एथलेटिक्स, सुटिङ, तेक्वान्दो र जुडोले ओलम्पिकमा सहभागिता जनाउने भएका हुन् ।
पौडी र एथलेटिक्समा अनिवार्य सहभागी हुने भए तापनि सुटिङ, तेक्वान्दो (पारा) र जुडोले वाइल्ड कार्डमार्फत सहभागिता जनाउने भएका हुन् ।
सोनियाले ४८ किलोमुनिको प्रतिस्पर्धामा सहभागिता जनाउनेछन् ।
नेपाल पुलिसमा आबद्ध सोनिया हालै नेपालमा सम्पन्न १३औँ दक्षिण एसियाली खेलकुदकी कास्य पदक विजेता खेलाडी हुन् । सोनियाले सन् २०१९ मा बङ्गलादेशमा आयोजना भएको जुडो च्याम्पियनसिपमा क्याडेटतर्फ ४४ किलोमा स्वर्ण पदक प्राप्त गरेकी थिइन् ।
सन् २०१९ मा मोरक्कोमा आयोजना भएको विश्व जुनियर च्याम्पियनसिपमा एक बाउट जीत निकाल्दै २०० अंक बटुल्न सफल भएका कारण त्यसैलाई र अन्य प्रतिस्पर्धामा उनले देखाएको प्रदर्शनलाई आधार मानेर वाइल्ड कार्ड प्राप्त गर्न सफल भएकी हुन् ।
सोनिया ओलम्पिकमा सहभागिता जनाउने जुडोकी पाँचौँ खेलाडी भएकी छन् । यसअघि जुडोबाट सन् १९८८ मा भएको सिओल ओलम्पिकमा ऋषिराम प्रधान र गङ्गाबहादुर डङ्गोलले सहभागिता जनाएका थिए । यस्तै, चीनको बेइजिङ ओलम्पिकमा देवु थापा र रियो ओलम्पिकमा फुपूह्लामु खत्रीले सहभागिता जनाएका थिए ।