नेपाली कांग्रेसको १४औँ महाधिवेशनबारे चासो र चर्चा बढिरहेका बेला भदौमै महाधिवेशन गर्ने भएको छ । तर, अगाडि तोकिएको मितिभन्दा ९ दिन पर सार्ने भएको छ । वडा अधिवेशन भने १ महिना ढिला ६ साउनदेखि सुरु गर्ने बताइएको छ ।

शनिबार बसेको कांग्रेस पदाधिकारी र पूर्वपदाधिकारीहरूको बैठकमा सभापति शेरबहादुर देउवाले महाधिवेशन भदौमै गर्ने बताएका थिए । पूर्वनिर्धारित मिति ७ असारदेखि वडा तहको अधिवेशन सुरु गर्न सक्ने अवस्था नभएको भन्दै महामन्त्रीले कार्यतालिका संशोधन गर्न प्रस्ताव पेस गरेका छन् ।

स्रोतका अनुसार क्रियाशील सदस्यता छानबिनको म्याद २० असारसम्म थप गर्ने प्रस्ताव आएको छ र यो अवधिमा बाँकी रहेको क्रियाशील सदस्यता वितरण तथा नवीकरणका साथै छानबिन सक्ने प्रस्ताव छ ।

त्यसलाई २४ जेठभित्र केन्द्रीय कार्यसमितिबाट अनुमोदन गर्ने र ६ साउनदेखि वडा तहको अधिवेशन गर्ने प्रस्तावमा उल्लेख छ । केन्द्रीय महाधिवेशन भने १६ भदौदेखि १९ भदौसम्म गर्ने महामन्त्रीको प्रस्ताव रहेको एक केन्द्रीय पदाधिकारीले जानकारी दिए ।