लोकसेवा पास गर्न यसो गर्नुहोस्
- लोकसेवा आयोगको परीक्षा दिनुभन्दा अगाडि परीक्षा दिने व्यक्तिमा मिहिनेत गर्ने जाँगर र सफल हुन्छु भन्ने आत्मविश्वास आवश्यक हुन्छ । 'हारको मानसिकताले युद्ध जितिँदैन' भन्ने कुरा सधैँ ख्याल गर्नुपर्छ ।
- लोकसेवामा प्रतिष्पर्धा अत्यन्तै बढी हुन्छ । त्यसैले लोकसेवामा उत्तीर्ण हुनका लागि पढ्ने तरिका, पढेको कुरा सम्झने तरिका र लेख्ने तरिकालगायत धेरै कुरामा कठिन मिहिनेत गर्नुपर्छ ।
- विषयवस्तुबारे प्रस्ट र जानकार हुनुपर्छ । पढेका विषयलाई परीक्षामा लेख्ने गरी प्रस्ट बनाउन बारबम्बार अभ्यास गर्नुपर्छ ।
- समयभित्रै स्पष्ट र प्रभावकारी ढंगले लेख्ने सीप विकास गर्नुपर्छ ।
- विषयको पाठ्यक्रमलाई गहन रूपमा पढ्ने र सोहीअनुसारका सामग्री खोजेर पढ्ने गर्नुपर्छ । सबै प्रश्नहरू पाठ्यक्रममै आधारित भएर सोधिने हुँदा पढ्ने बेलामा पाठ्यक्रमसँग जोडिएका विषयहरू, समसामयिक विषयहरू, दैनिक व्यवहारमा आइपरेका विषयहरूलाई ध्यान दिएर पढ्नुहोस् । ख्याल गर्नुहोस्, प्रश्नले सैद्दान्तिक र व्यवहारिक दुवै उत्तर खोजेको हुन्छ ।
- लेखन र प्रस्तुतीकरणमा विशेष ध्यान दिनुहोस् । पढ्दा धेरैतिर नछिरलिई पाठ्यक्रममा विशेष केन्द्रित हुँदा प्रश्नको उत्तर छोटो, मीठो र प्रभावकारी ढंगले दिन सकिन्छ ।
- पढ्दा नोट बनाउने बानी बसाउनुहोस् । यसो गर्दा पढेको कुरा सम्झिन सहज हुन्छ ।
- लेखाइमा प्रस्टतासँगै शुद्धतामा पनि ध्यान दिनुहोस् । अक्षरको सौन्दर्यले पनि जाँचकीलाई आकर्षित गर्छ, सकेसम्म सुन्दर र प्रस्ट अक्षर लेख्नुहोस् ।
- धेरै लेखेर मात्र राम्रो नम्बर आउँदैन । प्रश्नले खोजेको उत्तर छोटोमा पनि दिन सकिन्छ । यश कारण पहिला प्रश्न स्पष्ट हुनुहोस् अनि आवश्यक उत्तर मात्र छोटोमा दिने प्रयास गर्नुहोस् ।
- प्रश्नभित्र प्रश्न हुन सक्छन् । ती सबैको उत्तर अनिवार्य लेख्नुहोस् । जस्तो कि एउटा प्रश्न १० पूर्णाङ्कको छ भने त्यसमा पनि खण्डखण्ड हुन सक्छन् । त्यसभित्र ४ वटा खण्डमा प्रश्न सोधेको छ भने प्रत्येकको पूर्णाङ्क २.५ हुन्छ । २ वटा खण्डको मात्र उत्तर लेख्नुभयो भने ५ अंकको मात्र लेख्नुभयो । त्यसमा जति राम्रो गरे पनि ३ भन्दा बढी नम्बर आउँदैन ।
- लिखित परीक्षा नै लोकसेवाका लागि महत्त्वपूर्ण मानिन्छ । लिखितमा उत्कृष्ट बन्न सकियो भने अन्तर्वार्तामा छनोट हुने संभावना प्रबल हुन्छ ।